နှစ်နိုင်ငံ သဘောတူညီမှုဖြင့် ပဲရောင်းချရန် စီးပွားကူးသန်း ပြည်ထောင်စုဝန်ကြီးနှင့် ကိုယ်စားလှယ်အဖွဲ့ အိန္ဒိယနိုင်ငံသွားမည်

မတ်ပဲနှင့် ပဲစင်းငုံအဝယ် ရပ်ဆိုင်းပြီး တစ်လအတွင်း နှစ် နိုင်ငံသဘောတူညီမှုဖြင့် ပဲရောင်း ချရေး ဆွေးနွေးညှိနှိုင်းရန် အိန္ဒိယ နိုင်ငံသို့ ဖေဖော်ဝါရီတတိယပတ် တွင် စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးဆောင်သည့်အဖွဲ့ သွားရန် စီစဉ်နေသည်။

တိကျသော ခွဲတမ်းသတ် မှတ်ချက်ဖြင့် မြန်မာနိုင်ငံမှ မတ် ပဲ၊ ပဲစင်းငုံအပါအဝင် ပဲဝယ်ယူ ရေးကို အိန္ဒိယအစိုးရနှင့် ညှိနှိုင်း ရန်ဖြစ်ကြောင်း စီးပွားရေးနှင့် ကူး သန်းရောင်းဝယ်ရေးဝန်ကြီးဌာန လက်ထောက်အတွင်းဝန် ဦးခင် မောင်လွင်က ပြောသည်။

စီးပွားကူးသန်းဝန်ကြီးဌာန အပြင် မြန်မာနိုင်ငံ ပဲမျိုးစုံနှင့် နှမ်း ကုန်သည်အသင်း၊ ဘုရင့်နောင် ပဲကုန်စည်ဒိုင်မှ တာဝန်ရှိသူများ ပါဝင်မည်ဟု ၎င်းကပြောသည်။ နှစ်နိုင်ငံ စီးပွားရေး လုပ်ငန်းရှင် များညှိနှိုင်းမည့် အစီအစဉ်များ လည်း ပါဝင်သည်။

အိန္ဒိယ အစိုးရ၊ ပုဂ္ဂလိက စီးပွားရေး အဖွဲ့အစည်းများနှင့် တွေ့ဆုံဆွေးနွေးရာတွင် အဖြေထွက်ပေါ်လာနိုင်မည့်အခြေအနေကို မေးရာ၌ ‘‘ညှိနှိုင်းရမယ့်အချက်တွေက အများကြီးရှိနေတယ်။ ဆွေးနွေးမှုပေါ်မူတည်ပြီး အဖြေထွက်လာမယ့် အခြေအနေမျိုး ပါ’’ဟု ဦးခင်မောင်လွင်က ပြော သည်။

အိန္ဒိယခရီးစဉ်တွင် အစိုးရ သဘောတူညီမှုဖြင့် ပဲရောင်းချရန် နားလည်မှုစာချွန်လွှာအတွက် ပေးပို့ထားသည့် စာချုပ်မူကြမ်းနှင့် ပတ်သက်ပြီး ဆွေးနွေးစရာများပါဝင်ကြောင်း ၎င်းက ပြောသည်။

နှစ်နိုင်ငံ အစိုးရသဘောတူ ညီမှုဖြင့် ပဲရောင်းချမည့် အစီအ စဉ်တွင် ဈေးနှုန်းသတ်မှတ်ချက် နှင့် ပတ်သက်၍ ပြည်တွင်းပဲကုန် သည်များ၊ လယ်သမားအချို့က အိန္ဒိယ အစိုးရ၏ ကမ်းလှမ်းချက်ကို မနှစ်သက်ပေ။ အိန္ဒိယ အစိုးရက ပဲတစ်ဧက စိုက်ပျိုး ထုတ်လုပ်မှု ကုန်ကျစရိတ်အပါ အဝင် ၁၀ ရာခိုင်နှုန်း အပိုဆောင်း အမြတ်ပေးပြီးသာ မြန်မာနိုင်ငံမှ ပဲဝယ်ယူရန် ကမ်းလှမ်းသည်။

အိန္ဒိယကမ်းလှမ်းချက်က ပြည်တွင်း လွတ်လပ်သော ပဲဈေး ကွက်ကို အကန့်အသတ်ဖြစ်စေ သောကြောင့် ပဲကုန်သည်များ၊ လယ်သမားများက သဘောမတူ သဖြင့် နားလည်မှုစာချွန်လွှာ လက်မှတ်ရေးထိုးရန် အခက်အခဲ ဖြစ်သည်ဟု စီးပွားကူးသန်းဝန် ကြီးဌာန ပြည်ထောင်စုဝန်ကြီး ဒေါက်တာသန်းမြင့်က ပြောခဲ့ သည်။ အိန္ဒိယနှင့် အစိုးရချင်း သဘောတူညီမှုဖြင့် ပဲရောင်းချ မည့် အစီအစဉ်ကြန့်ကြာနေချိန် တွင် ၂၀၁၉ ဇန်နဝါရီ ၃၁ ရက် အိန္ဒိယ အကောက်ခွန် ဌာနကထုတ်ပြန်သည့် ပဲတင်သွင်းမှု ရပ်ဆိုင်းသည့် ကြေညာချက်သည် ပြည်တွင်းပဲဈေးကွက်အတွက် ရိုက်ခတ်မှုကြီးမားလာသည်။

ပဲစင်းငုံအသစ်တန်ချိန် ငါး သောင်းကျော်နှင့် မတ်ပဲတန်ချိန် လေးသိန်းကျော်အတွက် လတ် တလော ဈေးကွက်ဈေးစု လျော့ နည်းခြင်းက ပြည်တွင်း ပဲကုန် သည်များနှင့် ပဲစိုက်ပျိုးသည့် တောင်သူလယ်သမားအတွက် စိုးရိမ်စရာဖြစ်သည်။

ပါကစ္စတန်နှင့် နီပေါနိုင်ငံ က မြန်မာနိုင်ငံမှ မတ်ပဲကို ဈေးတိုးပေးပြီး ဝယ်ယူသော်လည်း မတ်လတွင် အသစ်ပေါ်လာမည့် မတ်ပဲတန်ချိန် လေးသိန်းကျော်အ တွက် စိုက်ပျိုးစရိတ်အောက် ဈေး မကျစေရန် မြန်မာနိုင်ငံ ပဲမျိုးစုံနှင့် နှမ်းကုန်သည်များအသင်းက ပြင် ဆင်နေသည်။

စီးပွားကူးသန်း ပြည်ထောင် စုဝန်ကြီး ခရီးစဉ်တွင် အသင်းမှ တာဝန်ရှိသူများ အတူလိုက်ပါပြီး ‘‘သီးသန့် ခွဲတမ်းပိုရရေးကို တောင်းဆိုဖို့ရှိပါတယ်’’ဟု မြန်မာ နိုင်ငံ ပဲမျိုးစုံနှင့် နှမ်းကုန်သည်အ သင်း အတွင်းရေးမှူး ဦးမင်းကိုဦး က ပြောသည်။

လက်ရှိ ပြည်တွင်းဈေးကွက် တွင် မတ်ပဲတစ်တန် ဈေးနှုန်း ကျပ်ခြောက်သိန်းနှစ်သောင်းနှင့် ပဲစင်းငုံ (၂၀၁၇)ဈေးနှုန်းက ကျပ် ခုနစ်သိန်းကျော် ဈေးရှိနေသည်။ ထိုဈေးနှုန်းက မတ်လ မတ်ပဲအ သစ်ပေါ်ချိန်တွင် အိန္ဒိယအဝယ် မရှိပါက ဈေးကျဆင်းနိုင်သည်။

စိုက်ပျိုးထုတ်လုပ်မှု ကုန်ကျ စရိတ်အောက်သို့ ပြည်တွင်းပဲဈေး မကျဆင်းရေး ပဲ၊ နှမ်း အများပိုင်ကုမ္ပဏီက ဈေးနှုန်းတစ်ခု သတ်မှတ်ပြီး ဝယ်ယူရန် စီစဉ်ထားသည်။

Top News